Trans Pacific Partnership (TPP), economic intruder?

INAAPURA umano sa Kongreso ang pag-aapruba sa House Bill 6395 ngayong linggo.

Sa nasabing panukala, pahihintulutan ang lending companies, financing companies at investment houses sa bansa na 100% na maging pag-aari ng foreign nationals.

Ayon sa IBON, ito ay resulta nang masigasig na pagla-lobby ng Joint Foreign Chambers of Commerce at ng US Embassy.

Pinuri pa nga ni US Ambassador Philip Goldberg ang pagpapasa ng HB6395, sinabi nyang may mga balakid pa rin para maging miyembro ang bansa ng TPP katulad ng pagbabawal sa foreign participation sa land ownership na nakasaad sa 1987 Philippine Constitution.

Ang karanasan ng bansa sa hindi mapigil na liberalisasyon na nagtulak sa pamahalaan para naising lumahok sa TPP, ay hindi makatuwiran, ayon sa grupo.

Sinabi ng IBON, ang TPP ay base sa ‘obsolete and failed model’ ng free trade agreements na seryosong hinahamon ang awtonomiya ng bansa sa pagsusulong ng tunay na pag-unland.

Anila, dapat labanan ng gobyerno ang self-interested lobbying ng foreign governments at transnational corporations.

Tingin natin ay may masamang epekto sa ekonomiya ng bansa ang TPP.

Ito ang bagong hitsura ng ‘pananakop’ ng dayuhang kontrol sa mga negosyo at lupain sa bansa.

Kung inaakala ng ilang marurunong na opisyal diyan na kapag pumasok ang mga transnational companies sa ating bansa ay mabubuhay ang industrialisasyon, nagkakamali po tayo.

Ang TPP ay magbibigay ng lisensiya sa mga dayuhan na lantarang makapag-ari ng lupain at iba pang propriedad. Maging ang public utilities at social services ay maaari na nilang pasukin at gawing pribadong pag-aari nila bilang negosyo.

Sa pangunguna ng Estados Unidos, ang TPP ay nilagdaan kamakalawa sa New Zealand ng 12 bansa sa gitna ng mga protesta sa buong rehiyon katulad ng Auckland at Kuala Lumpur.

Nabatid na naalarma ang mga kritiko kaugnay sa malawak na pagkiling ng TPP para sa corporate interests at malawak na sakop ng economic areas na nais makontrol ng TPP.

Kabilang dito ang pagpapahintulot sa foreign corporations na mag-invest sa public utilities at social services.

Sa kabila nang malawakang pagtutol, ang gobyerno ng Filipinas ay marubdob na nagnanais na maging miyembro ng TPP.

Sonabagan!

Ang TPP na ito ay base sa ‘obsolete and failed model’ ng free trade agreements na seryosong hinahamon ang awtonomiya ng bansa sa pagsusulong ng tunay na pag-unlad.

Dapat ay maging mulat ang gobyerno sa paglaban sa self-interested lobbying ng foreign governments at transnational corporations.

Dahil kung hindi, isang araw ay magigising tayong ‘dayuhan sa sariling bayan.’

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com