HATAW! D'yaryo ng Bayan hatawtabloid.com
SA pagkakataong ito, si direk Carlo J. Caparas mismo ang gagawa ng remake ng kanyang kuwentong Angela Markado, na naisapelikula na rin naman noong araw sa direksiyon ni Lino Brocka. Pero sinasabi nga ni direk Carlo, ang pelikula ni Brocka ay umani ng awards dito sa Pilipinas at maging sa abroad, pero ang nakikita naman niyang advantage, dahil siya ang sumulat ng orihinal na istorya, mas maikukuwento niya iyon ng maganda sa pelikula.
Isa pa, noong unang gawin ang pelikula, limitado nga lang ang maipakikita sa pelikula dahil noon ay umiiral pa ang mahigpit na batas sa sensura sa pelikula, na ngayon ay wala na. Kaya siguro nga mas malaya niyang nagawa ang mga eksenang iniwasang gawin sa naunang pelikula.
Iyang Angela Markado ay kuwento ng isang babaeng pinagsamantalahan ng isang grupo ng mga lalaki ng paulit-ulit at ang kanyang ginawang paghihiganti pagkatapos sa mga humalay sa kanya. Natanong nga tuloy si direk, hindi ba may pagkakahawig din iyan sa kanyang hit movie noon, iyong Maggie dela Riva Story na tungkol din sa rape?
Ang sagot naman ni direk Carlo, talagang parehong rape ang tema ng dalawang pelikula, pero aniya, mas matindi iyang Angela Markado. Kasi roon sa Maggie dela Riva, ang biktima ay pinagtulungan lamang halayin sa loob ng magdamag. ItongAngela Markado, mas mahirap dahil ang panghahalay ay tumagal ng ilang araw.
Iyong Maggie dela Riva, nagtapos nang ang mga rapist ay mahatulan ng kamatayan sa silya elektrika. Mas delikado ang eksena ng Angela Markado dahil ang biktima ay naghiganti sa mga humalay sa kanya. Kaya may elemento rin naman iyan ng violence.
Palagay ni direk, mas nahirapan si Andi Eigenmann sa pelikulang iyan kaysa ginawa ni Dawn Zulueta sa pelikula niya noong araw. Mas brutal din kasi ang mga eksena sa Angela Markado.
HATAWAN – Ed de Leon
