Pag-eendoso ni Daniel ng politiko, nakaaapekto na sa career

MUKHANG hindi nga yata naging maganda ang epekto kay Daniel Padilla ng kanyang mga ginagawang political endorsements. Hindi naman siguro masasabing matindi na talaga ang epekto, dahil na-maintain naman niya ang ratings ng kanyang serye sa isang isinagawang nationwide survey, pero isang katotohanan na sa Metro Manila survey, nalamangan iyon ng one percent lang namang audience share ng kanilang rival program.

Kasi sinasabi nga nila, sa mga probinsiya ay nariyan pa rin iyong mga fan na walang kinalaman sa mga national issues. Dito sa Metro Manila, medyo kritikal ang mga fan at nakikialam sila sa mga bagay-bagay kahit na hindi showbiz, kagaya nga niyang mga political endorsement.

Hindi inaasahan ng mga tao na malalamangan ang serye ni Daniel, considering na ang pinakamataas na ratings na nakuha ng kanyang katapat na artista sa dating network noon ay hanggang two percent lamang. Ipagpalagay man natin na nakalipat iyon sa isang mas malakas na estasyon, hindi pa rin ganoon kalakas ang batak niyon, kaya nakapagtatakang nalampasan nila kahit na one percent lamang ang show ni Daniel.

Kung sa bagay, hindi naman masasabing basehan na agad iyan, dahil ang lumabas lang naman ay resulta ng one day survey. Pero nakababahala rin iyon dahil kung iisipin ninyo, iyong popularidad ni Daniel  sa ngayon ang sinasabi nilang hindi kayang banggain.

Hindi man diretso, nabangga na siya at medyo tumagilid na noong lumabas iyongAlDub. Ngayon baka nagkamali na naman sila ng diskarte at naapektuhan na ang ratings ng kanyang serye.

“Kasi hindi naman talaga si Daniel ang may gusto niyon eh,” sabi ng isang movie writer na confidante ni Daniel at ng nanay niya. Pero ganoon pa man, mukhang wrong move nga.

Kaya nga sinasabi namin, mas wise si Alden Richards na inalok man ng napakalaking halaga, ayaw pumasok sa political endorsements. Ganoon din naman si Sarah Geronimo na mukhang nadala na sa mga political endorsement na ginawa niya noong araw.

( Ed de Leon )