HATAW! D'yaryo ng Bayan hatawtabloid.com
KAILANGANG umepekto ang magic ni direk Carlo Caparas diyan sa pelikula niyang Angela Markado. Mahirap iyan dahil remake nga ang pelikula. Ikalawa, kung ang pagbabatayan mo ay ang huling pelikula niyang si Andi Eigenmann, iyong tungkol sa multo sa sinehan, aba e napakalaking flop niyon. Ibig sabihin, mahirap mong asahan na may batak si Andi kahit na sabihing magaling siya sa pelikula.
Pero nakagawa na ng ganyang milagro si direk Carlo noong araw. May umiiral na slump sa industriya. Hindi pa naman malaking box office star noon si Dawn Zulueta. Pero nang gawin niya iyong Maggie dela Riva Story, aba naging isang napakalaking hit at bumangon ang buong industriya.
Kung mangyayari ulit ngayon ang ganoon, aba eh malaking tulong iyon kay Eigenmann na sa ngayon ay hindi mo pa masasabing matatag talaga ang career. Nakagawa na rin naman siya ng mga hit na pelikula noong araw, pero hindi masasabing siya ang nagdala ng mga pelikulang iyon.
HATAWAN – Ed de Leon
