Alden, mas sikat pa sa mga nakapasok sa Starstruck

MAGSISIMULA ngayong Lunes, September 7, ang bagong season ng Starstruck. Maglalabanan na naman ang mga kabataang may ambisyong maging mga sikat na artista. Hindi naman natin maikakaila na may sumikat din naman diyan sa Starstruck. Hanggang ngayon sikat pa rin ang kanilang first winner na si Mark Herras, bagamat ang mga sumunod sa kanya ay mukhang palutang-lutang pa rin ang career.

Hindi pa naman masasabing sikat na talaga si Mike Tan. Iyong Aljur Abrenica, nawawala na rin ngayon. IyongMarky Cielo talagang wala na. Iyong Steven Silva rin ano nga ba ang career ngayon? Pero iyong ni-reject ngStarstruck na si Alden Richards, sikat na sikat ngayon.

Hindi mo masasabi talaga kung sino ang sisikat. Kahit na sabihin mong kabilang sa iyong mga hurado ang pinakamagagaling at bumoboto pa rin sa pamamagitan ng text ang publiko, hindi mo masasabi kung sa ganyang contest ay makukuha mo ang right choice. Kasi nga wala namang nakatitiyak ng formula kung  paano mag-build up, at wala rin namang nakatitiyak kung ano ang hitsura dapat ng magiging isang big star.

HATAWAN – Ed de Leon