HATAW! D'yaryo ng Bayan hatawtabloid.com
INAAMIN ni Derek Ramsay na malaking relief para sa kanya na nagkasundo na rin sila kahit na paano ng ABS-CBN, kasi nga may ginawa na siyang pelikula ngayon para sa Star Cinema, bagamat sa telebisyon ay may exclusive contract pa rin siya sa TV5.
Nagkaroon ng silent ban ang ABS-CBN laban kay Derek nang bigla siyang umalis sa network at lumipat nga sa TV5. Kaya minsan nga pati ang isang pelikulang ginawa niya para sa ibang producers na isa siya sa mga bida, inalis ang picture niya sa poster at ang pangalan niya ay inalis din sa billing ng pelikulang ang nagdidis-distribute ay ang Star Cinema. Hindi rin maaaring banggitin ang kanyang pangalan ng mga artista nila na nakakasama ni Derek sa pelikula.
Talagang maliwanag na sumama ang loob ng ABS-CBN, dahil sa paniwala nilang sila ang nag-build up nang husto kay Derek, tapos ay umalis sa kanila. Hindi mo rin naman masisisi si Derek dahil nakatanggap siya ng isang matinding offer mula sa TV5, na mas kikita siya ng mas malaki sa mas maikling panahon kaysa kung nanatili siya sa ABS-CBN. Sa diskarte ni Derek, hindi naman niya alam kung hanggang kailan ang kanyang popularidad, kaya kailangang samantalahin niya ang lahat ng mga magagandang pagkakataon.
HATAWAN – Ed de Leon
