Binatilyo, 5 pa sugatan sa hit & run

NAGA CITY – Sugatang isinugod sa ospital ang isang binatilyong papunta sa simbahan makaraan ma-hit and run ng isang owner type jeep sa Brgy. Sta. Cruz, Naga City kamakalawa.

Kinilala ang biktimang si Alfred Pimentel, 17-anyos.

Nabatid na naglalakad ang biktima sa nasabing lugar nang biglang humarurot ang owner type jeep at siya ay nahagip.

Bunsod nito, nagpagulong-gulong ang biktima ngunit imbes tulungan ay tinakbuhan lamang siya ng driver ng jeep.

Napag-alaman, sa pagtakas ng suspek ay nabangga niya ang isang tricycle service na lulan ang limang miyembro ng mag-anak.

Sugatan sa insidente ang mga biktimang sina Carlito Moral, 47; Michelle Moral, 41; Christine Moral, 15; Cyrus Moral, 12; at Carl Daniel Moral.

Agad nadala sa ospital ang mga biktima habang tuluyang nakatakas ang hindi pa nakilalang suspek.

Patuloy na pinaghahanap ng mga pulis ang suspek para mapanagot sa insidente.