Misis ginilitan ni mister (Sinisi sa pagbubuntis ng anak)

GENERAL SANTOS CITY – Agad binawian ng buhay ang isang misis makaraan gilitan sa leeg ng kanyang mister sa loob mismo ng kanilang bahay sa Prk. Kulasi, Brgy. Labangal sa Lungsod ng General Santos kahapon.

Kinilala ang namatay na si Jovelyn Ola, 36, at nang magbalik-Islam ay naging Fatima Ola ang pangalan, habang ang mister ay si Abdul Javier Ola, 35, isang Muslim.

Sa imbestigasyon, matindi ang pagtatalo ng mag-asawa sa loob ng kanilang kuwarto pasado 2 a.m. nang mangyari ang insidente kahapon.

Gamit ang itak, ginilitan sa leeg ng mister ang kanyang misis na agad ikinamatay ng biktima.

Sinisi ng mister ang kanyang misis sa pagkakabuntis ng kanilang panganay na anak na si Ahara Ola, 16, dahil sa pagpapabaya.

Patuloy ang manhunt operation ng pulisya sa suspek. Habang nanawagan ang isa pang anak ng mag-asawa sa kanyang ama na sumuko na.