Bakasyonista nag-selfie sinalpok ng motorsiklo

LAOAG CITY – Patay habang ginagamot sa Mariano Marcos Memorial Hospital and Medical Center sa Batac City ang isang bakasyonistang nag-selfie pero nabangga ng motorsiklo sa Brgy. Balaoi, Pagudpud, Ilocos Norte kamakalawa.

Kinilala ni Sr. Insp. Samson Amistad, hepe ng PNP Pagudpud, ang biktimang si Liezel Wage Ramones, 37,  naninirahan sa Brgy. Ganagan sa bayan ng Bacarra.

Habang kinilala ang suspek na isang menor de edad na si Serigno Lagundino, 17, construction worker at residente ng Brgy. Balaoi sa bayan ng Pagudpud.

Nangyari ang aksidente nang patungo ang biktima kasama ang ilan pang bakasyonista sa zipline ngunit bumaba muna sa kanilang sinakyan upang mag-selfie.

Ngunit habang nagse-selfie ay bigla na lamang siyang binangga ng humaharurot na motorsiklo.

Nasugatan din ang suspek na nabiyak ang bibig kaya dinala rin sa pagamutan.