Salsal sa harap ng biktima bagong modus ng kawatan (Sa Ilocos Sur)

VIGAN CITY – Iniimbestigahan ng PNP-Vigan kung sino ang nasa likod ng bagong modus operandi ng pagnanakaw na nagma-masturbate ang suspek sa harap ng bibiktimahin sa lalawigan ng Ilocos Sur.

Sa nakuhang impormasyon, isang babaeng kinilalang si Joan Escobia ang unang biktima ng nasabing modus operandi.

Sa salaysay ng babae, nangyari ang insidente dakong 2 a.m. sa tapat ng kanyang pinagtatrabahuang burger stand sa Mabini Street, Brgy. 3, Vigan City.

Aniya, biglang nagpakita ang hindi nakikilalang suspek sa harap niya at saka nag-masturbate o naglaro ng kanyang ari.

Dahil sa gulat at takot na baka siya magahasa, tumakbo palayo ang babae at nagtungo sa bayan ng Bantay.

Ngunit nakalimutan niyang dalhin ang bag niya na may lamang pera, iba’t ibang identification cards at isang unit ng cellphone, bumalik siya sa pinangyarihan ng insidente ngunit napag-alamang wala na ang kanyang bag.

Pinaniniwalaang modus ng mga magnanakaw na gulatin ang kanilang bibiktimahin sa pamamagitan ng pagma-masturbate at kapag tumakbo ang biktima ay saka pagnanakawan.