Evidence depository ang kailangan Part 2

ARAW-ARAW nating nababasa sa dyaryo na may P20-milyon ha-laga ng shabu ang nakumpiska; naaresto ang isang pusher sa pagbebenta ng isang kilo ng cocaine na nagkakahalaga ng milyon-milyong piso; o kaya naman ay P1 milyon halaga ng marijuana ang natagpuan sa bangkay ng isang lalaking pinatay.

Ngunit pagkatapos nito, wala nang naire-report tungkol sa kung ano na ang nangyari sa mga nasamsam na droga. Sinunog ba ang mga ito? Sino ang nagsunog? Itinago ba sila ng mga imbestigador? O ang malala, baka na-”recycle” na ang mga ito ng mga “enterprising” na pulis na nagbenta sa mga ito sa mga tulak na kasapakat nila.

Gawin nating halimbawa ang isang tao na inaresto sa pagbibitbit ng baril. Kinasuhan siya sa korte pero kalaunan ay ibinasura rin ang kaso dahil hindi sumisipot sa mga hearing ang pulis na may hawak sa kaso—at nag-iingat sa baril.

Ngayon, ‘saan na ang baril? Nai-turn over ba ito? Kung sasabihing nasa property custodian, ‘eto ang follow up question: Totoo ba ang accounting sa mga idinepositong ebidensiya sa depository ng bawat unit o istasyon ng pulis? O puwede nang itago ng pulis ang baril sa sarili niyang drawer o locker?

Pero ang pinakamatindi rito ay kung ang nakumpiskang baril, gaya ng kinasapitan ng nasamsam na droga, ay muling ibebenta nang ilegal. At hindi na bago ito sa atin. Madalas na na-ting naririnig ang mga kuwentong ganito.

Kapag nagpatuloy ang kalokohang ito, wala ring silbi ang “Oplan Bakal” na ipinatutupad ng mga pulis upang mapigilan ang pagkalat ng mga ilegal na baril sa bansa. Magbibigay pa ito ng oportunidad sa mga tiwali na kumita nang ekstra kapag muling naibenta ang kanilang mga nakum-piska. Ganito rin ang kalakaran sa mga nasamsam na ilegal na droga.

***

SHORT BURSTS. Para sa mga komento o reaksiyon, mag-email safiringline@ymail.com o mag-tweet sa @Side_View.

Robert B. Roque, Jr.