Illegal bonuses sa Philhealth isauli kaya ni Riza Hontiveros?!

Hinahamon ngayon si senatorial candidate Riza Hontiveros ng National Association of Lawyers for Justice and Peace (NALJP) na pinamumunuan ni Atty. Jesus Santos na pangunahan niya ang pagsasauli ng P1.761-bilyon ‘ILLEGAL BONUSES’ na ipinamahagi sa kanila sa PhilHealth bilang mga opisyal.

Ayon kay Atty. Santos, kailangan patunayan ni Ms. Hontiveros na karapat-dapat siya sa pagtitiwala ng sambayanan sa pamamagitan ng pagsasauli sa nasabing illegal bonuses at hikayatin ang iba pang opisyal ng PhilHealth.

Ikinatuwiran noon ng PhilHealth na inaprubahan ang nasabing bonuses sa pamamagitan ng board resolutions.

Ngunit ayon sa Commission on Audit (COA), ang nasabing mga resolusyon ay hindi ipinasa sa Office of the President para aprubahan bilang rekesitos sa ilalim ng Section 6 ng Presidential Decree 1597.

Ang nasabing illegal bonuses ay ipinamahagi sa mga opisyal at empleyado ng PhilHealth noong 2013 na umabot sa P1.761 bilyones.

Por delicadeza nga naman, dapat isauli ang napakalaking ‘illegal bonuses’ na ‘yan dahil kuwarta ‘yan ng mga miyembro ng PhilHealth.

At sino ba ang mga miyembro ng PhilHealth?

‘Yung maliliit na manggagawa at mga emple-yado na kinakaltasan kada sahod para tiyak na makapagbayad sa PhilHealth.

Mantakin ninyong pinagtutubuan nang malaki ang kontribusyon nila sa PhilHealth, pero ang tubo ay napupunta sa mga opisyal habang ang mga miyembro ay kakarampot ang napakikinaba-ngan?!

Kailangan pa bang ireklamo sila, bago nila isauli ‘yang illegal bonuses na ‘yan?!

Ngayon, hinahamon si Madame Riza, para patunayan niya na karapat-dapat siya sa tiwala ng sambayanan. Dapat siyang manguna sa pagsasauli ng ILLEGAL BONUSES na kanyang natanggap…

Kaya n’yo ba ‘yun, Ms. Hontiveros?!

Just asking lang po…

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com