Binatilyo sugatan sa saksak ng tanod

SUGATAN ang isang 18 anyos estudyante nang pagsaksaksakin ng barangay tanod na sinita ng biktima sa pag-ihi sa pader kamakalawa ng gabi sa Pasay City.

Inoobserbahan sa San Juan De Dios Hospital si John Paul Christian Eugenio, ng 2417 Cuenca St. ng siyudad, dahil sa tatlong tama ng saksak sa katawan.

Habang arestado ng pulisya ang suspek na si Jayson Balarosa, 24, barangay tanod ng Brgy. 27, Zone 4 ng lungsod, habang nilalapatan ng lunas sa pagamutan dahil sa pagkabagok ng ulo nang matumba sa kalsada.

Sa imbestigasyon nina SPO1 Rodolfo Soquina at PO3 Reynaldo Wangi, dakong 11: 46 p.m. nang maganap ang insidente kanto ng Rufino Mateo St., Interior FB Harrison St., Brgy. 27, Zone 4 ng nabanggit na lugar.

Sinasabing umiihi ang suspek sa pader ng interior ng FB Harrison St. nang maispatan ng biktima na sakay ng kanyang motorsiklo kaya sinita ang barangay tanod.

Nairita ang suspek kaya kinompronta ang biktima na humantong sa kanilang pagtatalo.

Pagkaraan ay umuwi ang suspek sa kanilang bahay ngunit nang bumalik ay may dala nang patalim at tatlong beses na inundayan ng saksak ang biktima.

Nakatakdang kasuhan ang suspek ng frustrated murder.