Pokwang, gusto nang magpakasal sa American BF

HINDI itinanggi ni Pokwang na gusto na niyang mapakasalan siya ng kanyang American BF na si Lee O’Brien.

Mag-iisang taon na rin namang magkarelasyon sina Pokwang at ang actor na si Lee kaya hindi kataka-takang mapag-usapan na rin nilang dalawa ang ukol sa pagpapakasal.

Sa interbyu ni Kuya Boy Abunda sa Tonight With Boy Abunda, sinabi ni Pokwang na hindi siya nangangarap ng bongang kasal, ”Kahit nga karinderya lang, basta masaya kaming magsasama.”

Aminado naman si Pokwang na masaya siya sa piling ni O’Brien kaya naman ito na talaga ang gusto niyang makatuluyan. Masaya rin at maganda ang takbo ng career ni Pokwang at sa November 18 ay ipalalabas na ang kanyang Wang Fam movie na idinirehe ni Wenn Deramas mula sa Viva Films.

Ginagampanan ni Pokwang ang pangunahing papel ni Malou, ang bukod-tangi at pinakahuling “virgin” ng isang asawang clan.

Kasama rin sa Wang Fam sina Benjie Paras, Andre Paras, Yassi pressman, Alonzo Muhlach, Abby Bautista, Candy Pangilinan, Wendell Ramos, Atak Arana, at Dyosa Pockkoh.

SHOWBIZ KONEK – Maricris Valdez Nicasio