Iza, hindi billing conscious

KAHANGA-HANGA ang ugali ni Iza Calzado. Sa estado niya ngayon, na buhos ang biyaya at mabentang-mabenta, at magaling na aktres, hindi pala siya iyong artistang billing conscious.

Napatunayan na ito noon sa Starting Over Again ng Star Cinema na wala raw ang pangalan ni Iza sa original poster at sa theater lay out lang nakabalanda ang name niya. Pero okey lang kay Iza dahil ang mahalaga sa kanya ay maging markado ang acting na ginagawa niya. Na siya namang napatunayan niya.

Naulit ito sa bagong pelikula ni Iza sa Regal Entertainment, ang Somebody To Love ni Direk Joey Reyes, na wala rin ang pangalan ni Iza sa billing. “In the end, it is your performance that will prove your worth,” giit ni Iza nang makausap namin ito sa pa-presscon cum birthday party sa kanya ni Mother Lily Monteverde.

Sa movie na ito, tiyak na marami ang maninibago kay Iza dahil malutong na malutong siyang magmura at magtaray dito. “’Yan ang tatak ng isang mahusay na aktres. Nagagawa niyang isabuhay sa screen ang isang role na kontrang-kontra sa pagkatayo niya. Naku, reveleation si Iza sa role niya sa movie,” sambit ni Direk Joey na siyang nagbigay ng best actress award kay Iza sa isang Cinemalaya movie.

Bukod sa STL, namamayani rin si Iza sa Kapamilya teleserye na Hawak Kamay, at mayroon pang isang movie mula sa Star Cinema, ang Maria Leonora Teresa. Bukod dito, mayroon pang isang pelikulang gagawin ang aktres sa Regal. “I love Iza very much. She’s really good. Maganda na magaling pa at walang sakit ng ulo na ibinibigay sa set,” pahayag naman ni Mother Lily.

Sa August 20 na mapapanood ang Somebody To Love na birthday presentation ni Mother Lily.