HATAW! D'yaryo ng Bayan hatawtabloid.com
ni Pilar Mateo
SA Thanksgiving press conference para sa Got to Believe ng ABS-CBN na magtatapos na sa March 7, 2014 with their #bestendingever, nakausap namin ang butihing ina ni Kathryn Bernardo na kinagigiliwan ng mga manonood sa karakter niya bilang Chichay.
Ang mga bagay kasi na natanong kay Kathryn eh, may kinalaman sa love life nito. Kung sila na nga ba ni Daniel (Padilla), kung pinapayagan na ba siya na ma-kiss o makipag-kiss on screen. At kung payag na ba ang mga magulang niya na may umakyat na ng ligaw sa kanya.
Sabi naman ng very accommodating na Mommy ni Kathryn, pagdating sa bagay tungkol sa ligawan, hindi raw nila sinasakal ng kanyang mister ang anak nila sa isang bagay na normal lang naman na mangyari sa isang dalaga, lalo pa at gaya ni Kathryn.
“Paalala lang naman ang lagi naming nasasabi sa kanya. Pero, hindi kami ‘yung tipo na maghihigpit sa kanya pagdating sa bagay na ‘yan. Kasi, ako naranasan ko rin ang mapaghigpitan noon. kaya, kung ano ‘yung sa tingin ko na nagdulot sa akin ng hindi magandang karanasan o pakiramdam, ‘yun naman ang iniiwasan kong mangyari kay Kathryn.
“At saka, hindi ako ‘yung nagbibigay ng date kung kailan pwede ligawan ang anak ko. Malaki na siya. Naituturo namin sa kanya kung ano ‘yung tama. Hindi naman natin malalaman kung ano ang mangyayari bukas. Kaya, kung ano ‘yung ngayon, doon tayo magpo-focus.”
Naniniwala ba si Mommy sa mga gaya naming paniwalang-paniwala na na sina Kathryn at Daniel na?
Natawa si Mommy.
“Kayo na po ang nagsabi. Sa kanila pa rin natin malalaman ang sagot. Ang sa akin naman, mababait ang mga bata. Nakikita ko ang isang magandang pagtitinginan ng magkaibigan sa kanila. Ako na, aaminin ko, kapag pinanonood ko sila eh, talagang kinikilig ako.”
At sigurado kami na isa si Mommy sa totoong malulungkot dahil mami-miss na niya sina Chichay at Joaquin gabi-gabi.
