Arnold Reyes mahusay sa Akusada  

MATABIL
ni John Fontanilla

TRENDING sa social media ang eksena na lumalabas na mag-bestfriend sa hit Kapuso serye na Akusada sina Benjamin Alves bilang si Wildred at Arnold Reyes bilang Dennis.

Usap-usapan sa apat na sulok ng Pilipinas at sa mundo ng social media ang episode sa Akusada na nalaman na ni Wilfred  na si Dennis ang totoong pumatay sa kanyang unang asawa na si Joi, ang karakter na ginagampanan ni Max Collins.

Puring-puri ng manonood ang husay ni Arnold. Kung sabagay talaga namang mahusay na artista si Arnold at patunay dito ang mga award na nakuha nito sa iba’t ibang award giving body.

Ang Akusada ay pinagbibidahan ni Andrea Torres with Lianne Valentin, Ashley Sarmiento, Marco Masa, Ronnie Liang, Ahron Villena, Shyr Valdez, Jeniffer Maravilla, at marami pang iba.

Kaya naman huwag palampasin ang nalalapit na pagtatapos ng 2025 intense drama series. Mapapanood ito mula Lunes hanggang Biyernes, 4:00 p.m. sa GMA Afternoon Prime at Kapuso Stream.