Tambay, patay sa nakaalitang kapitbahay

PATAY ang 52-anyos lalaki matapos pagbabarilin ng nakaalitang kapitbahay sa eskinita sa Barangay Bahay Toro, Quezon City nitong Sabado ng madaling araw.

Kinilala ang biktima na si Arturo Valle Ortis, 52, jobless, may live-in partner, habang nakatakas ang suspek na si Jayson Pasquito Germones, alyas Jayson Bay, 34, kapwa residente sa Sitio Militar, Brgy. Bahay Toro, Quezon City.

Sa report ng Criminal Investigation and Detection Unit ng Quezon City Police District (CIDU- QCPD),  bandang 4:10 ng madaling araw, 27 Hulyo, nang maganap ang insidente sa eskinita ng nasabing barangay.

Batay sa imeestigasyon ni P/SSgt. Lorenz Mappala, nasa loob ng bahay ang live-in partner ng biktima na si Mercy nang makarinig ng sunud-sunod na putok ng baril sa labas.

Dahil dito ay lumabas ng bahay si Mercy at doon ay nakita niyang duguang nakabulagta ang live-in partner habang tumatakbo palayo ang suspek patungo sa kalye ng Sitio Militar.

Agad humingi ng tulong si Mercy sa kanilang mga kapitbahay at naisugod ang  biktima sa Quezon City General Hospital pero idineklarang dead on arrival ni Dr. Alfred Magpantay, dahil sa tinamong maraming tama ng bala sa iba’t ibang bahagi ng katawan.

Inaalam ng mga awtoridad ang motibo sa pamamaril habang tinutugis pa ang suspek. (ALMAR DANGUILAN)