Live-in partners pinagbabaril sa kuwarto, babae patay

PATAY ang 39-anyos ginang habang sugatan ang kaniyang live-in partner nang pagbabarilin habang natutulog sa kanilang kuwarto ng kanilang kapitbahay sa  Quezon City, ayon sa ulat nitong Huwebes.

Kinilala ang napaslang na si Roselle Navalta, 39, habang sugatan ang live-in patner niya na si Richard Casuga, 41, kapwa nakatira sa Tandang Sora Avenue, Brgy. Tandang Sora, Quezon City.

Patuloy pang tinutugis ang suspek na kinilalang si Paolo Yanguas, alyas Pao-Pao, 27, residente sa General Ave., Brgy. Tandang Sora, QC.

Sa naantalang report ng Criminal Investigation and Detection Unit ng Quezon City Police District (CIDU- QCPD), bandang 2:20 am nitong nakaraang Sabado, 20 Abril, nang maganap ang insidente sa  tahanan ng mga biktima sa nasabing lugar.

Batay sa imbestigasyon ni P/MSgt. Alvin Quisumbing, mahimbing na natutulog ang live-in partners nang pumasok ang suspek sa loob ng kanilang bahay at pinagbabaril ang mga biktima.

Matapos ito ay agad na tumakas ang suspek patungo sa hindi matukoy na destinasyon dala ang armas na ginamit sa krimen.

Kapwa isinugod ang mga biktima sa Quezon City General Hospital ngunit bandang 8: 22 pm noong Linggo, 21 Abril, ay binawian ng buhay si Navalta.

Patuloy pa ang isinasagawang imbestigasyon ng pulisya sa motibo ng nangyaring pamamaril. (ALMAR DANGUILAN)