Dennis-Bea wala ng ilangan sa mga maseselang eksena

I-FLEX
ni Jun Nardo

HUHUSGAHAN na ang reunion series nina Dennis Trillo at Bea Alonzo na Love Before Sunrise dahil sa September 25 ito mapapanood sa GMA pero sa streaming app na Viu eh sa September 23 ang simula ng streaming.

Eh dahil sabay ini-launch noon sa ABS-CBN, kabisado na ni Dennis si Bea.

“Wala nang ilangan lalo na kapag hinahawakan ko siya sa katawan, sa braso.

“Eh pagdating naman sa acting, walang dudang magaling si Bea. Nagbibigayan kami para lumabas na maganda ang eksenang magkasama kami,” pahayag ni Dennis sa mediacon bago ang screening.

Mabigat ang tema ng serye na tungkol sa dalawang dating lovers, nag-asawa, at nagtagpo muli ang landas.

Pero sa ganitong sitwasyon, “Mahirap ‘yung ganoong sitwasyon lalo na kapag may asawa ka na. Hindi ko siguro magagawa ‘yon,” sabi ni Dennis.

Of course, si Jennylyn Mercado ang asawa ni Dennis ngayon at sa mga pahayag niya sa interview kay Boy Abuda, hindi siya magtataksil sa asawa.

“Kapag alam kong doon na sa pagtataksil pupunta, ako na mismo ang lalayo sa babae!” rason ni Dennis.

Star studded na, powerful pa ang cast ng serye at magkatrabaho rito ang former couple na sina Ricky Davao at Jackie Lou Blanco pati na ang hindi much-publicise  relationship nina Sef Cadayona at Andrea Torres.