MANGINGISDA NAKALIGTAS SA PANANAKSAK (Kinursunada)

NAKALIGTAS sa kamatayan ang isang mangingisda matapos kuyugin at saksakin ng isa sa tatlong suspek sa Navotas City, kamakalawa ng gabi.

Sa tinanggap na ulat ni Navotas police chief Col. Dexter Ollaging, dakong 10:30 pm, habang nakaupo sa Badeo 5, Brgy. San Roque si Jonathan Biguina, 30 anyos, ilang metro sa harap ng kanilang bahay, sinugod siya ng tatlong suspek, dalawa sa kanila ay armado ng kahoy na dos-por-dos saka kinulata ang biktima.

Nagawang makatakbo ng biktima ngunit hinabol siya ng mga suspek at nang makorner, isa sa kanila ang naglabas ng patalim saka sinaksak sa likod si Biguina dahilan upang bumagsak siya sa semento.

Mabilis na nakapagresponde sa lugar ang mga tanod ng Brgy. San Roque pero mabilis na nakataks ang mga suspek habang isinugod sa Tondo Medical Center (TMC) ang biktima para magamot ang mga saksak.

Patuloy ang follow-up operation ng pulisya laban sa mga suspek na dalawa sa kanila ay kinilala bilang sina Jayson Esparcia, 18 anyos, Grade 8 student ng Oliveros St., at Mark Anthony Sevilla, 20 anyos, helper, kapwa ng Brgy. Tangos North habang inaalam ang motibo ng pagsugod at pananaksak. (