P.4-M shabu kompiskado
5 DRUG SUSPECTS DINAKIP NG PDEA SA BULACAN DRUG DEN

DINAKIP ang limang drug suspects, ng mga tauhan ng Philippine Drug Enforcement Agency (PDEA), sa buy bust operation sa hinihinalang drug den sa San Jose del Monte, Bulacan, nitong Sabado ng hapon.

Batay sa ulat ng PDEA operating team na isinumite kay PDEA Director General Wilkins Villanueva, kinilala ang mga suspek na sina Arturo Trinos, 49 anyos, Norilyn Mariano, 43, Annalyn Dupra, 40, Sanny Bernardo, 46, at isang 17-anyos dalagita, pawang residente sa Minuyan Proper, San Jose Del Monte, Bulacan.

Sa report, dakong 4:30 pm nitong 30 Enero, nang isagawa ang drug operation sa Minuyan Proper.

Una rito, nakatanggap ng tip ang PDEA hinggil sa ilegal na operasyon ng mga suspek kaya’t agad nagkasa ng buy bust operation sa sinasabing drug den sa lugar.

Agad inaresto ang mga suspek nang magpositibo ang transaksiyon.

Nasamsam sa mga suspek ang 50 gramo ng shabu na nagkakahalaga ng P400,000, at drug paraphernalia.

Inihahanda ang kasong paglabag sa Republic Act 9165 o The Comprehensive Dangerous Drugs Act of 2002 laban sa mga suspek. (ALMAR DANGUILAN)