Mga kandidato pinarerendahan sa Comelec

HINIKAYAT ni Department of the Interior and Local Government (DILG) Secretary Eduardo Año ang Commission on Elections (Comelec) na magpalabas ng mga panuntunan para sa mga aktibidad ng mga kandidato bago ang pagsisimula ng campaign period sa Pebrero 2022.

Ang pahayag ni Año ay kasunod ng ginawang caravan ng presidential aspirant na si dating senador Ferdinand “Bongbong” Marcos, Jr., at ng running mate na si Davao City Mayor Sara Duterte-Carpio sa Commonwealth Avenue, Quezon City, nitong Miyerkoles.

Aniya, bukod sa nagdulot ng pagsisikip ng daloy ng mga sasakyan ay hindi rin nasunod ang health protocols gaya ng physical distancing makaraang magsisiksikan ang mga tao.

“We’re asking the Comelec to say what are the political activities that are allowed and not allowed. We hope it will be definite because there might be similar incidents in the future,” ani Año sa kaniyang mensahe.

Kaugnay nito, kanila umanong tatalakayin ang isyu sa Inter-Agency Task Force for the Management of Emerging Infectious Diseases (IATF) upang maiwasan ang katulad na “super spreader” events.

“We will discuss this with the IATF, with the Comelec because the start of the campaign period is still in February, it’s a long way to go. We should be thankful that the Omicron (variant of CoVid-19) is not yet here and our numbers (on CoVid-19 infections) are good,” giit ni Año.

Binigyang diin ng kalihim na ang tanging magagawa ng Philippine National Police (PNP) at local government units ay magpatupad ng minimum public health standards.

Una rito, ikinalungkot ni Quezon City Mayor Joy Belmonte ang pagtangging makipag-ugnayan ng mga organizer ng caravan sa local authorities.

Humingi ng paumanhin ng kampo ni BBM sa mga motorista na naabala dahil sa pagbigat ng trapiko na idinulot ng kanilang caravan. (ALMAR DANGUILAN)