HATAW! D'yaryo ng Bayan hatawtabloid.com
NATAGPUAN ang isang hubo’t hubad na bangkay ng hindi kilalang lalaki, nakasilid sa isang sako sa Brgy. Greater Lagro, Quezon City, nitong Linggo ng umaga.
Ang biktima ay inilarawang nasa edad 25 hanggang 30 anyos, may taas na 5’2, blonde ang buhok, at katamtaman ang pangangatawan.
Batay sa ulat ng Criminal Investigation and Detection Unit (CIDU) ng Quezon City Police District (QCPD), dakong 7:30 am kahapon nang madiskubre ang bangkay ng biktima sa Quirino Highway sa harapan ng Royal Class Motor, Barangay Greater Lagro.
Nagbibisikleta sa lugar ang testigong si Ramil Mamangon nang mapuna ang isang sako na may bahid ng dugo sa gilid ng kalsada.
Nang lapitan ay nakita umano ni Mamangon na may nakausling paa sa sako kaya’t agad humingi ng tulong kay P/Cpl. Darwin Panares, nakatalaga sa Police Community Precinct 1 (PCP-1).
Nang mabuksan ang sako, natuklasang nakagapos ang mga kamay at paa ng biktima at may mga tama ng mga bala ng hindi batid na kalibre ng baril sa iba’t ibang bahagi ng katawan.
Nakuha sa crime scene ng SOCO team sa pamumuno ni P/Lt. John Agtarap ang tatlong basyo ng bala, tatlong plastic straw, at isang sakong kulay abo.
Ayon sa SOCO, posibleng sinakal muna ang biktima makaraang makitaan ng malalim na marka sa leeg bago pinagbabaril ng mga salarin saka isinako at iniwan sa lugar.
Nagsasagawa ang mga awtoridad ng masusing pagsisiyasat upang matukoy ang pagkakakilanlan ng biktima, ng mga suspek, at upang matukoy din ang motibo sa pagpatay. (ALMAR DANGUILAN)
