ni ALMAR DANGUILAN
NABAWI man ang apat na kilong saging na saba, deretso pa rin sa karsel ang isang lalaki na ‘nagnakaw’ ng tinda ng kanyang kapitbahay sa Brgy. Apolonio, Quezon City, nitong Huwebes ng umaga.
Sa ulat ni P/SSgt. Jefferson Li Sadang ng Quezon City Police District (QCPD) La Loma Police Station 1, bandang 11:30 am, 21 Enero, nang maganap ang insidente sa harapan ng Antonette Street, Parkway Village, Brgy. Apolonio Samson, QC.
Sa reklamo ng biktimang si Everlito Bumatay, abala siya sa pag-estima sa ibang mamimili nang maispatan niya ang suspek na si Manny Magsalin na pasimpleng isinilid sa dalang kahon ang apat na kilong saba na nagkakahalaga ng P340 at mabilis na tumakas.
Hinabol ni Bumatay ang papatakas na suspek at nang maabutan ay agad niyang dinala sa kanilang barangay saka ipinasa sa himpilan ng pulisya.
Matapos mabawi sa suspek ang apat na kilong saba na kaniyang ninakaw ay ikinulong siya sa La Loma Police Station at inihahanda ang kasong theft na isasampa laban sa suspek.
Hindi sinabi ng suspek kung bakit niya ‘ninakaw’ ang tinda ng kapitbahay.
