HATAW! D'yaryo ng Bayan hatawtabloid.com
TINIYAK ng apat na alkalde ng CAMANAVA (Caloocan, Malabon, Navotas, at Valenzuela) sa kani-kanilang nasasakupan na magkakaroon ng bakuna para sa CoVid-19 na magagamit sa kanila simula sa ikalawang quarter ng taon.
Ito’y matapos sabihin nina mayors Oscar Malapitan ng Caloocan, Antolin Oreta III ng Malabon, Toby Tiangco ng Navotas, at Rex Gatchalian ng Valenzuela, na gumawa na sila ng kasunduan sa British-Sweden multinational pharmaceutical company, AstraZeneca para sa pagbili ng bakuna laban sa CoVid-19.
Ayon kay Malapitan, hindi bababa sa 600,000 doses ang bibilhin ng pamahalaang lungsod sa AstraZeneca bilang bahagi ng CoVid-19 vaccination program ng lungsod.
“Tuloy-tuloy ang ating paghahanda para sa pagbili ng bakuna kontra CoVid-19. Nakikipag-ugnayan tayo sa mga pharmaceutical company upang matiyak na makakukuha tayo ng bakuna kapag ito ay aprobado na ng Inter-Agency Task Force at Food and Drug Administration,” ani Mayor Oca.
Sinabi ni Oreta, ang Malabon ay naglaan din ng paunang halaga na P150 milyon sapagkat ito rin ang tiniyak ng parehong pharmaceutical company para sa bakuna sa CoVid-19.
Sa Navotas, sinabi ni Tiangco na sumang-ayon ang AstraZeneca na ibigay sa lungsod ang paunang 100,000 doses na maaaring mapakinabangan ng 50,000 residente dahil dalawang doses ang kinakailangan para sa bawat indibidwal.
Aniya, inaprobahan ng city council ang paglabas ng P20 milyon para sa layuning ito.
“Good news! Valenzuela City signs a deal with AstraZeneca Pharmaceuticals Philippines for the advance purchase of 640,000 AstraZeneca vaccine doses,” pahayag ni Mayor Gatchalian sa kanyang FB page.
Ani Gatchalian, inihahanda na nila ngayon ang vaccine roll out plan ng lungsod upang maging maayos ang distribusyon ng bakuna kapag nagsimula na itong dumating.
Nasa 320,000 indibidwal ang mababakunahan, na 70 porsiyento ng target na populasyon ng lungsod (hindi kasama ang 18 anyos pababa.
(ROMMEL SALES)
