HATAW! D'yaryo ng Bayan hatawtabloid.com
HANDA ba talaga ang pamahalaan na magpatupad ng “State of Public Health Emergency” kaugnay ng krisis sa coronavirus o COVID 19?
E kasi ba naman, masyado tayong nagtataka kung bakit tuwing haharap sa panayam ang mga opisyal ng gobyerno at Department of Health (DOH) e parang wala silang alam gawin kundi takutin o alarmahin ang sambayanan.
Sa araw-araw yatang ginawa ng Diyos, nag-aanunsiyo ng ‘numero’ ang DOH pero hindi naman nag-aanunsiyo kung ano ang nararapat gawin?!
Isa pa, bakit kailangan ianunsiyo kung hindi pa tiyak o hindi pa sigurado?! Lalo tuloy nagpa-panic ang mga tao.
Ano ba ang magagawa ng isang pangkaraniwang tao sa numerong ‘yan?! Dapat ang iniaanunsiyo, ano ang gagawin upang makaiwas.
At saka puwede ba, magtrabaho nang tahimik ang mga kinauukulang awtoridad, tigilan ang mga anunsiyo na wala namang maitutulong sa mamamayan?!
Wala namang magagawa ang pag-aanunsiyo ng ‘bilang’ kung walang kakibat na paghahanda.
Ano na ba ang ginagawa ng mga health workers sa barangay level?! Mayroon bang health workers sa barangay level?!
Kung mayroon, hayaan silang mag-ikot sa bawat komunidad at tiyakin ang kaligtasan ng bawat mamamayan.
Sino ang magdi-disinfect sa mga pasilidad? Kanino kukunin ang mga kagamitang kailangan sa disimpeksiyon?
Kung kinakailangan mamahagi ng alcohol, face mask at iba pang kailangan para sa prevention, saang tanggapan kukunin?!
Kung hindi pa po nagagawa ang mga bagay na ‘yan, masasabi nating ang kahandaan para sa state of public health emergency ay nananatiling hilaw.
Kaya imbes magparamdam ng seguridad sa mamamayan ay lalo pang nagbubunsod ng ‘panic’ kung anunsiyo nang anunsiyo lang ng bilang ng mga apektado ng COVID 19.
Kaya isang tanong, isang sagot lang po, kanino makikinig ang mamamayan kaugnay ng COVID 19 at kanino sila kukuha ng mga kakailanganin upang makapaglunsad ng preventive measures?!
Pakisagot na nga po!
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa JERRYAP888@YAHOO.COM. Para sa mga nakaraang isyu ng BULABUGIN please visit https://hatawtabloid.com
BULABUGIN
ni Jerry Yap
