HATAW! D'yaryo ng Bayan hatawtabloid.com
PURING-PURI ni JM de Guzman ang galing ng kapareha niyang si Alessandra de Rossi sa pelikulang Lucid, isa sa Cinema 1 Originals entry kaya umaasa siyang hindi ito ang una at huli nilang pagsasama.
Ani JM, sana ay makatrabaho niya uli ang aktres, “Kasi, alam kong mahusay siyang aktres and gusto ko pong laging matuto, laging mayroong bago.”
Sinabi pa nitong pareho sila ng ugali ni Alessandra. “Parehas kami. Wala kaming kahit anong demand, positive kami pareho, para lang kaming nag-e-experiment.”
Kakaiba ang tema at atake ng Lucid kaya na-enjoy kapwa nina JM at Alessandra ang pelikula. First time kasi nilang gumawa ng ganitong klaseng role sa movie.
Ang Lucid ay tungkol sa mga taong kayang kontrolin ang panaginip.
Sinabi nga ni JM na may mga tanong nakagagawa nito. “May mga nagpapraktis po talaga niyon, eh, lucid dreaming ‘yung nakokontrol nila ‘yung panaginip nila, naaalala nila lahat.”
Sambit naman ni Alex, “Ang ‘Lucid’ po ay tungkol sa isang babaeng marunong mag-lucid dreaming, so, sa kanyang daily life, hindi niya nakokontrol ‘yung mga nangyayari sa buhay niya, bored na bored siya sa life niya, ganoon. Parang empty na siya.
“Pero pagdating sa gabi, ‘pag natulog na siya, ayun, nakokontrol niya lahat at doon sa isa sa mga dream niya, mami-meet niya ‘yung karakter ni JM na hindi niya makontrol.”
Ang Lucid ay idinirehe ni Victor Villanueva na mayroong premiere night sa November 10 sa Trinoma Cinema.
Bukod sa Lucid, kasama rin bilang entries sa Cinema 1 Originals filmfest ang Metamorphosis nina Gold Aceron, Iana Bernardez, Ivan Padilla, Ricky Davao,, at Yayo Aguila; 0 nina Jasmine Curtis, Lauren Young, at Anna Luna; Sila Sila nina Gio Gahoi at Topher Fabregas; Tayo Muna Habang Hindi Tayo nina JC Santos; Yours Truly, Shirley ni Regine Velasquez at Jane Oineza, at Tia Madre nina Cherie Gil at Jana Agoncillo.
SHOWBIZ KONEK
ni Maricris Valdez Nicasio
