Obrero tinaga ng kapitbahay

KRITIKAL ang kalagayan sa pagamutan ng  isang obrero nang pagtatagain ng kayang kapitbahay matapos madaanan sa isang inuman na nauwi sa mainitang pagtatalo sa Malabon City, kamakalawa ng gabi.

Ginagamot sa Tondo Medical Center (TMC) ang biktimang kinilalang si Ronnel Diwata, residente sa Block 4 Kadima, Brgy. Tonsuya sa nasabing lungsod, sanhi ng taga sa ulo.

Patuloy na pinaghahanap ng mga pulis ang suspek na kinila­lang si Renato Clarite, 35 anyos, mabilis na nakatakas matapos ang pananaga.

Sa pinagsamang ulat nina P/SSgt. Julius Mabasa at P/SSgt. Ernie Baroy, dakong 9:00 pm nang maganap ang insidente sa kahabaan ng Block 4 ilang metro ang layo sa bahay ng mga sangkot.

Naglalakad umano ang biktima sa lugar at pauwi nang madaanan ang grupo ng suspek na nag-iinuman.

Sa hindi malamang dahilan, kinompronta ng suspek ang biktima na naging dahilan ng kanilang pagtatalo hanggang biglang maglabas ng jungle bolo si Clarite at tinaga sa ulo si Diwata.

Matapos tagain, mabilis na tumakas ang suspek sa hindi matukoy na direksiyon dala ang ginamit na jungle bolo habang isinugod ang biktima ng kanyang mga kaanak sa Ospital ng Malabon bago inilipat sa natu­rang pagamutan.

(ROMMEL SALES)