HATAW! D'yaryo ng Bayan hatawtabloid.com
SA KULUNGAN bumagsak ang 24-anyos lalaki matapos bugbugin ang kanyang live-in partner maging ang nagmalasakit na matalik na kaibigan sa Valenzuela City kamakalawa ng hapon.
Sa ulat na nakarating kay Valenzuela police chief P/Col. Carlito Gaces, dakong 4:00 pm nang muling makatikim ng kalupitan sa kamay ng suspek na si Louie Alban, walang hanapbuhay, ang kanyang kinakasama na si Jean Brusola sa loob ng kanilang tirahan sa Blk 6 Lot 15, Camia St., Doña Marciana Subdivision, Brgy. Ugong.
Nagsumbong si Brusola sa kaibigang si Sally Official, 36, na nakatira rin sa naturang bahay at sa kagustuhang matulungan ang biktima, kinausap ng ginang ang suspek sa pag-asang hindi na niya sasaktan ang kinakasama.
Ikinairita ito ng suspek at pinagsasapak ang ginang sa mukha at likurang bahagi ng ulo.
Dahil dito, magkasamang nagtungo sa Valenzuela Police Community Precinct (PCP) 8 ang magkaibigan at isinumbong ang ginawa ng suspek na naging dahilan upang dakpin siya ng pulisya. (ROMMEL SALES)
