Tumanggi sa tagay… Mechanical maintenance bugbog-sarado sa 2 lasing
Tanod tagay
PINAGTULUNGAN bugbugin ng dalawang lasing ang isang mechanical maintenance makaraang tumanggi sa alok na tagay sa Malabon City, kamakalawa ng hapon.
Isinugod sa Tondo Medical Center (TMC) ang biktimang si Nelson Adrino, 30 anyos, binata, residente sa C. Perez St., Brgy. Tonsuya dahil sa pinsala sa mukha at katawan.
Arestado ang mga suspek na sina Mitchell Parcel III, 44 anyos, ng Joreta St., at Ronie Mark Ortiz, 24 anyos, residente rin sa C. Perez, kapwa sa Brgy. Tonsuya.
Lumalabas sa imbestigasyon nina P/SSgt. Julius Mabasa at P/SSgt. Philip Cesar Apostol, dakong 5:30 pm, naglalakad ang biktima sa kahabaan ng C. Perez St., pauwi sa kanilang bahay nang harangin ng lasing na mga suspek para imbitahan sa kanilang inuman.
Tumanggi ang biktima pero nagalit ang mga suspek at bigla na lamang pinagtulungan bugbugin si Adrino. Natigil sa pambubugbog ang mga suspek nang dumating ang mga nagrespondeng barangay tanod na nagresulta sa pagkakaaresto ng dalawa. (ROMMEL SALES)
