Pedicab driver tigbak sa tarak

PATAY ang isang mister matapos pasukin at pagsasaksakin ng kapwa pedicab driver na lagi umanong binu-bully ng biktima sa Malabon City, kahapon ng madaling araw.

Dead on the spot si Roderick Depaz alyas Michael, 41-anyos, res­idente sa Santo Niño St., Brgy. Concepcion sanhi ng mga saksak sa tiyan habang pinaghahanap ng mga pulis upang maa­resto ang suspek na si Benjie Claro, nasa hustong gulang.

Lumabas sa imbesti­gasyon nina PSSgt. Julius Mabasa at PSSgt. Richard Andrew Calaycay, da­kong 4:15 am nang maganap ang insidente sa loob ng bahay ng biktima matapos pasukin ng suspek na armado ng patalim.

Sa pahayag sa pulisya ng anak ng biktima na si Marco, narinig niya ang kaguluhan kaya agad siyang bumaba at nakita niya sa akto ang pana­naksak ng suspek sa kanyang ama.

Nang tangkain nitong tulungan ang ama ay mabilis na tumakas ang suspek sa hindi matukoy na direksiyon dala ang ginamit na patalim.

Napag-alaman ng pulisya, lagi umanong binu-bully ng biktima ang suspek tuwing nalalasing gayonman inaalam pa ng pulisya ang nasa likod ng insidente.

(ROMMEL SALES)