HATAW! D'yaryo ng Bayan hatawtabloid.com
SA KULUNGAN ang bagsak ng dalawang driver matapos mahuli sa aktong humihithit ng marijuana sa Caloocan City, kamakalawa ng gabi.
Kinilala ni Caloocan Police chief, S/Supt. Restituto Arcangel ang mga naarestong suspek na si Michael Pangilinan, 36 anyos, ng Gen. Malvar St., Brgy. 142; at Victorino Bonifacio, 47 anyos, ng 86 Interior Mariano Ponce St., Brgy. 132 ng nasabing lungsod.
Ayon kay Caloocan Police Community Precinct (PCP) 1 commander C/Insp. Joebie Astucia, dakong 10:30 pm, nagpapatrolya sina PO1 Jemar Veluz at PO1 Alfredo Adatta Jr., sa kahabaan ng Brgy. 132, Bagong Barrio nang isang concerned citizen ang lumapit sa kanila at inireport ang hinggil sa isang grupo na may pot session sa Gen. Concepcion St.
Mabilis na nirespondehan ng mga pulis ang naturang lugar at naaktohan ang mga suspek na humihithit ng marijuana na naging dahilan upang siya ay arestohin.
Narekober ng pulisya sa lugar ang isang disposable lighter, aluminum foil na may bahid ng sunog na marijuana at dalawang plastic sachet ng hinihinalang pinatuyong dahon ng marijuana na nakuha sa mga suspek. (ROMMEL SALES)
