HATAW! D'yaryo ng Bayan hatawtabloid.com
MAGKAKAROON pala ng director’s cut ang digital movie na Glorious nina Angel Aquino at Tony Labrusca na idinirehe ni Connie Macatuno.
Nauna naming makatsikahan ang production manager ng Dreamscape Digital for iWant na si Ms Ethel Espiritu at nabanggit niya na may director’s cut ang Glorious. Ito ang sinagot sa amin nang tanungin namin kung may sequel o part two ang pelikula.
“May director’s cut which is coming soon. Marami pang makikita sa love scenes. Visually kasi in-edit siya ‘pag ‘yung eksena dire-diretso at naka-linger, personally ha, iba ang feeling. Nakita ko na ‘yung ibang rushes, hindi ko pa alam kung kailan airing,” kuwento ng TV executive.
Wala namang maisagot sa amin kung nakailang views na ang Glorious dahil hindi niya alam ang metrics.
“Si sir Deo (Endrinal) ang nakaaalam, hindi ko kasi alam ‘yan,” saad nito.
Sakto naman naka-chat namin si direk Connie at tinanong namin kung kailan ang airing ng director’s cut.
“Wala pa akong abiso, tinatapos pa,” sagot sa amin.
Hirit namin na mas marami pang matitinding eksenang hindi naipakita sa unang streaming nito.
“Matindi ba ‘yung napanood mo?” tanong sa amin ni direk Connie at sinagot namin ng ‘oo.’
Tinanong namin kung may topless o nudity sina Angel at Tony, “abangan mo na lang,” ito ang sabi ng Glorious director.
Akalain mo, pinag-usapan na nang husto ang unang digital film ng Dreamscape nang magkaroon ito ng screening sa Santolan Town Plaza, eh, may mas malala pa pala.
Hmm, kaya pala napapangiti sina Tony at Angel kapag napag-uusapan ang Glorious, sobrang glorious nga siguro.
FACT SHEET
ni Reggee Bonoan
