HATAW! D'yaryo ng Bayan hatawtabloid.com
LOOKING forward at excited na ang Japanese actress-model at 2014 Miss Japan-Universe 1st runner-up na si Hiro Nishiuchi na muling makabalik sa Pilipinas.
Ilang beses nang nakapunta sa Pilipinas si Hiro (na itinalagang Philippine Tourism Fun Ambassador para i-promote ang Pilipinas sa Japan) at talaga namang napamahal na sa dalaga ang ating bansa.
Kung puwede nga lamang na manirahan na siya sa Pilipinas ay ginawa na niya.
Ang goal ni Hiro na Promote Fun in the Philippines through International Conversations ay may layuning hikayatin at magbigay-kaalaman sa mga tao na nakikilala niya sa iba’t ibang panig ng mundo.
May mahigit 30 bansa na siyang napuntahan at nakapaglabas na rin siya ng isang libro tungkol sa mga napuntahan niyang lugar.
Ayon pa kay Hiro, mahal niya ang Pilipinas, ang mga tao rito pati na ang iba’t ibang pagkain natin. Ilang magagandang lugar na rin ang narating niya rito gaya ng Palawan, Iloilo, Cebu, at Bohol.
At since love niya ang Pilipinas kaya pwede rin niyang ikonsidera ang pagkakaroon ng kasintahan dito kung sakali.
Sa ngayon, abala si Hiro sa mga charity works niya sa Japan pati na rin sa pagiging aktres at modelo roon.
Patuloy niya itong gagawin at kapag nagkaroon ng pagkakataon ay aayusin na niya ang schedule niya para makapunta muli sa Pilipinas. Excited na si Hiro na balikan ang paraisong isla ng Boracay lalo pa nga at bumalik na ang kagandahan nito matapos ang anim na buwang pagpapasara para sa rehabilitation nito upang mailigtas ang isla sa pagkasira.
(ROMMEL GONZALES)
