Mike sa pagsasayaw ni Mark sa gay bar: nagtatrabaho siya para sa pamilya niya

RATED R
ni Rommel Gonzales

IPINAGTANGGOL ni Mike Tan ang kaibigang si Mark Herras.

May kinalaman ito sa pagpe-perform ni Mark ng ilang ulit sa Apollo male entertainment bar sa Baclaran, noong January 2025.

Ang Apollo ay isang gay bar.

Magkaibigan sina Mike at Mark at parehong Ultimate Male Survivor ng Starstruck, batch 1 and 2 respectively.

“Bilang performer, si Mark Herras nagtatrabaho siya para sa pamilya niya.

“Nagsasayaw talaga ‘yun, as a hip-hop dancer. So, alam ko sa mga gay bar mayroong gine-guest talaga na mga hip-hop dancer. Nagkataon na siya ‘yun.

“Eh naroon lang naman siya para magtrabaho, hindi naman siya andoon para maging macho dancer, eh.

“Entertainer si Mark Herras. First and foremost si Mark Herras bukod sa pagiging artista ay dancer.

“At iyon ‘yung way niya para mag-provide sa pamilya niya.

“May ginawa ba siyang imoral? Wala naman,” seryosong pahayag ni Mike bilang pagtatanggol sa kaibigan.

Mapapanood si Mike sa afternoon drama series ng GMA na House of Lies.

Nasa serye rin sina Kris Bernal, Beauty Gonzalez, Martin del Rosario, Snooky Serna, Jackie Lou Blanco, Lito Pimentel, at Kokoy de Santos, sa direksiyon ni Jerry Lopez Sineneng.

Mapanood ito sa GMA Afternoon Prime, 3:20 p.m..