HATAW! D'yaryo ng Bayan hatawtabloid.com
MAHIGIT P700,000 halaga ng shabu ang nakompiska ng mga operatiba ng Northern Police District (NPD) sa limang hinihinalang tulak ng ilegal na droga sa buy-bust operation sa Tondo, Maynila, kamakalawa.
Kinilala ni NPD director, C/Supt. Gregorio Lim ang mga suspek na magkapatid na sina Charlie Alvear, 34, at Jessie Alvear, 27; Allan Silva, 42; Maffie Rose Marquez, 28, at Richard Morales, 40, pawang mga residente sa Tondo, Maynila.
Batay sa ulat ni PO1 Almart Cruz, dakong 2:00 am nang ikasa ng mga tauhan ng District Drug Enforcement Unit (DDEU), sa pangunguna ni S/Insp. Cecilio Tomas, sa koordinasyon sa Manila Police District (MPD), ang buy-bust operation laban sa mga suspek sa Isabello delos Reyes St., Tondo, Maynila.
Agad inaresto ang mga suspek makaraan magbenta ng isang plastic sachet ng shabu sa isang operatiba na umaktong poseur buyer, kapalit ng P2,000 boodle money.
Narekober ng mga operatiba sa mga suspek ang 152 gramo ng hinihinalang shabu, tinatayang P760,000 ang street value, at boodle money na ginamit sa operasyon.
(ROMMEL SALES)
