PhilHealth chief sinibak

SEOUL – SINIBAK ni Pangulong Rodrigo Duterte si PhilHealth interim president Celestina dela Serna dahil sa napaulat na santambak na katiwalian sa ahensiya.

Kasalukuyang nasa Seoul si Duterte at iniha­yag niya ito sa isang kon­sultasyon sa mga opisyal ng pamahalaan na kasa­ma sa delegasyon.

Sinabi ng source, ang pumalit kay Dela Serna bilang officer-in-charge ng Philhealth ay si Roy Ferrer, doktor at board member ng PhilHealth bilang employers sector repre­sentative at isang tubong Davao City.

Nauna rito, pinaim­bestigahan  ni Pangulong Duterte ang PhilHealth dahil sa COA report  na P627,000 travel expenses ni Dela Serna at ang pagkalugi ng ahensiya ng halagang P9-B.

Sa liham ng Philhealth Workers for Hope, Integrity, Trans­parency and Empower­ment (Philhealth WHITE) kay Pangulong Duterte, isiniwalat ng mga obre­ro ang pagla­gak ng P900 milyon mula sa P1 bilyon Externally Managed Fund (EMF) sa common stocks na labag sa Section 27 (d) ng Republic Act 10606 (PhilHealth Charter) na nagtatakda na dapat ay sa preferred stocks la­mang puwedeng i-invest ang EMF.

Ang pag-invest ng EMF sa common stocks ay nagresulta sa pag­kalugi ng P116 milyon, batay sa income state­ment.

Nabatid sa PhilHealth WHITE, katumbas ng estafa ang sabwatan nina Dela Serna at PHICEA President Esperanza Ocampo, ang ilegal na pagpataw ng P2,000 na 10% agency fee sa 2016  at 2017 collective negotiation agreement (CNA) in­centive na nagkaka­halaga ng P20,000 noong naka­lipas na Enero 2017 sa 3,500 casual employees na umabot sa P16 mil­yon.

ni ROSE NOVENARIO