HATAW! D'yaryo ng Bayan hatawtabloid.com
SA ikaapat na pagkakataon ay binisita ni Pangulong Rodrigo Duterte ang Marawi City upang alamin ang sitwasyon ng mga tropa ng pamahalaan na nakikipagbakbakan sa Maute terrorist group.
Sa kalatas ng Palasyo, nagtungo si Duterte sa Grand Islamic Mosque, dating kontrolado ng Maute at pinagtaguan ng kanilang mga bihag.
Nagpunta rin ang Pangulo sa Mapandi Bridge at sa main battle area at nakipag-bonding sa mga sundalo bilang pagbibigay ng morale support.
“Saludo ako sa inyo,” anang Pangulo sa mga sundalo kasabay nang pamamahagi ng groceries, watches at mga sigarilyo sa kanila.
“I will not stop you kasi under stress kayo,”aniya. Nangako rin siya na bibigyan ng free trip to Hong Kong ang lahat ng kababaihang tropa ng pamahalaan na nakatalaga sa Marawi.
Sa kanyang talumpati ay nagpasalamat si Duterte sa China sa ipinagkaloob na mga rifle sa mga sundalo.
Kasama ng Pangulo na nagpunta sa Marawi City sina Defense Secretary Delfin Lorenzana, National Security Adviser Hermogenes Esperon, AFP chief Eduardo Año, at Special Assistant to the President Christopher “Bong” Go.
Nagbigay-pugay ang Pangulo sa labi ni scout ranger captain Rommel Sandoval na namatay kamakailan sa pakikipaglaban sa mga terorista.
(ROSE NOVENARIO)
