26,000 assault rifles para sa PNP pinigil ng US

IPINAUUBAYA ng Palasyo sa Philippine National Police (PNP) ang pagbibigay ng opisyal na pahayag sa ulat na ipinatigil ng US State Department ang planong pagbebenta ng 26,000 assault rifles sa PNP.

Sinabi ni National Security Adviser Hermogenes Esperon Jr., hindi siya pamilyar sa isyu kaya’t si PNP chief Director General Ronald “Bato” dela Rosa ang dapat magbigay ng pahayag.

“Let Bato make the first comment. Am not familiar with the deal,” ani Esperon.

Batay sa report ng Reuters, ipinatigil ng US State Department ang balak na pagbebenta ng 26,000 assault rifle sa PNP bunsod nang pagtutol ni Sen. Ben Cardin, ang top Democrat sa Senate Foreign Relations Committee, sanhi ng mga isyu ng human rights violations sa Filipinas.

Ayon kay PNP Spokesman Sr. Supt. Dionardo Carlos, wala pang natatanggap na official notice ang PNP hinggil sa nasabing isyu.

Aalamin aniya ng PNP kung sinong supplier ng PNP ang bibili ng armas sa Amerika.

Sakali aniyang ayaw ni Uncle Sam na magbenta ng mga baril sa Filipinas ay may iba pang bansa na puwedeng bilhan ang supplier ng PNP dahil ang basehan sa pagbili ng armas ay specifications at hindi ang bansang nagmanupaktura.

( ROSE NOVENARIO )