BBM ang tunay na VP ni Presidente Rodrigo “Digong” Duterte

NAPANOOD natin sa isang video sharing, kung paano ipinakilala ni Pangulong Rodrigo “Digong” Duterte si dating Senador Bongbong Marcos sa kanyang pagbisita sa China.

Ipinakilala ni Pangulong Digong si BBM, bilang vice president.

Sabi tuloy ng isang nakapanood, kompirmado, si Bongbong ang bise presidente ni Duterte.

Ano kaya ang masasabi rito ni Senator Alan Peter Cayetano?!

Hindi naman kaya, naaaninaw talaga ng Pangulo na malaki ang tsansa na manaig ang protesta ni BBM sa sinabing ‘panalo’ ng nakaupong VP na si Madam Leni Robredo?!

Kung tutuusin, talagang si Pangulong Digong lang ang presidential candidate na maraming bise presidente.

Una na nga ang kanyang sariling VP na si Sen. Alan. Ang VP ng yumaong si Senator Miriam Santiago na si BBM. Maging ang VP ni Sen. Grace Poe ay may mga lugar na si Pangulong Duterte ang ipinapares sa kanya. Ang VP ni dating VP Jejomar Binay na si Gringo Honasan.

Kaya masasabi nating kakaiba talaga ang karisma ni PRRD noong nagdaang kampanyahan.

Kaya hindi na rin siguro nakapagtataka nang ipakilala ni Digong si BBM na bise presidente.

Anyway, hanggang ngayon, umaasa ang marami nating kababayan na mayroong positibong epekto ang nakasalang na protesta ni BBM.

Mukhang umaasa si Pangulong Digong na hindi maglalaon, magkakaroon na siya ng katuwang sa pagpapatakbo ng gobyerno sa kaparehong direksiyon.

Let’s keep our fingers crossed.

AGAW-EKSENA AT AGAW
KREDITO NA NAMAN

Sa pinakahuling nasakoteng pasahero sa Ninoy Aquino International Airport (NAIA) na tangkang magpuslit ng cocaine, muli na namang may umepal.

Ang babaeng pasahero ay isang Venezuelan, nahulihan nang halos 4.3 kilo ng high grade cocaine sa Ninoy Aquino International Airport (NAIA) terminal 3.

Siyempre ang nakasakote sa 20-anyos Venezuelan na si Genesis Lorena Pineda Salazar, ang Bureau of Customs (BOC) at ang Philippine Drug Enforcement Agency (PDEA).

Batay sa tip ng United States’ Drug Enforcement Agency darating si  Salazar via Dubai, kaya agad inatasan ni NAIA customs district collector Ed Macabeo ang kanyang mga tauhan. Ganoon din ang PDEA sa kanilang mga personnel na nasa airport.

Kaya hayun, agad nasabat ang Venezuelan na may dalang cocaine.

Nasa kustodiya na ng PDEA si Salazar para sa pagsasampa ng kaukulang kaso.

Sa NAIA, alam lahat ng inter-agencies kung kanino at sino ang nagtrabaho kaya nagtataka tayo kung bakit ang mga lumalabas sa ibang pahayagan ay taga-Bureau of Immigration (BI) ang nakasakote.

Noong nakaraan, BI spokesperson ang nagsasalita, ngayon naman mismong si Commissioner Jaime Morente na ang pinagsalita sa balita.

Bakit?!

Umeepal o nagpapalakas ba kay Commissioner Morente si spokesperson?

O gusto talaga nilang ikanal si Commissioner?!

Commissioner Morente, Sir, puwede bang itsek ninyong maigi ang loyalty ng mga tao sa paligid ninyo, lalo na ‘yung mga nakalalabas-masok sa inyong tanggapan?!

Alalahanin ninyo ang kasabihan…laging nasa huli ang pagsisisi.

‘Yun lang po.

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com

BULABUGIN
ni Jerry Yap