Mystica, nangangailangan ng tulong

NA-FEATURE ang paghihirap ngayon ng dating Rock Diva at Split Queen na si Mystica sa programang Frontrow. Isa kami sa nasubaybayan ang career ni Mystica (Rubyrose Villanueve sa tunay na buhay) at sa estado noon ni Mystica, ni sa hinagap ay ‘di ko akalain na aabot siya sa puntong walang-wala.

Nangungupahan si Mystica kasama ang kanyang partner na si Kid Lopez sa Gen. Trias, Cavite. Nang hindi na nakakaupa si Mystica, pinalayas siya. Mabuti na lang at may nagmagandang-loob sa kanya, ang FB friend niyang si Dovie San Andres na nagbigay ng pera para makalipat at makabili ng appliances.

Sumabay naman ang pagkaka-ospital ng anak ni Mystica na si Stanley na lumalaki ang tiyan. Na-confine ito sa Quezon City General Hospital at sa tulong din ni Dovie, naoperahan si Stanley at nakauwi na ngayon ng Tuguegarao, sa bahay ng ate ni Mystica na si Precy.

May natira pang pera sa ibinigay ni Dovie at sa suggestion din ni Dovie, ipina-bless ang bagong inuupahang bahay ni Mystica. Naging masaya ang tagpong iyon na pinagsaluhan ang mga niluto ni Mystica. May videoke at kumanta pa si Mystica ng Hindi Ako Isang Laruan.

Kinaumagahan, biglang may bumulagang video ni Mystica na humihingi ng antibiotics dahil sa iniindang sakit. Gusto ni Mystica na magpa-ospital pero naubos na yata ang pera na ibinigay ni Dovie.
MAKATAS – Tinny Basil