Dump truck swak sa bangin, 10 sugatan

BAGUIO CITY – Isinugod sa pagamutan ang 10 katao makaraan mahulog sa bangin ang sinasakyan nilang mini dump truck sa Baculungan Sur, Buguias, Benguet, kamakalawa.

Ayon sa report, binabaybay ng dump truck ang makitid at bako-bakong kalsada nang bigla itong gumuho na naging sanhi upang mahulog ang sasakyan sa naturang bangin na may lalim na 30 metro.

Bunsod nito, nasugatan ang sampung pasahero maliban sa driver.

Agad silang sinagip ng mga residente at itinakbo sa Lutheran Hospital sa Abatan, Buguias, para sa agarang lunas.

Ngunit apat sa kanila ang inilipat sa dalawa pang ospital sa Mt. Province at Baguio City.