HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez
SASAGARIN na nina Donny Pangilinan at Kyle Echarri ang pakikipagsagupaan para sa pinakamalaki nilang laban sa mas maaksiyon na huling tatlong linggo ng Kapamilya teleseryeng Roja.
Matinding pasabog ang hatid ng “final escape” trailer na inilabas ng ABS-CBN kamakailan na masusubok ang samahan at prinsipyo nina Liam (Donny) at Olsen (Kyle) sa gitna ng tumitinding sigalot laban sa grupo ng hostage-takers sa pangunguna ni Emil (Joel Torre).
Manganganib kasi ang relasyon ng mag-inang Liam at Greta (Lorna Tolentino) matapos mabulgar na si Greta nga ang utak sa likod ng hostage-taking sa La Playa Roja. Sa kabilang banda, magtutuos na rin si Olsen laban kay Homer (Christian Vasquez), ang pinaghihinalaan niyang tunay niyang ama na kasabwat din ng kalaban.
Sa kabila ng personal na alitan, malalagay naman sa alanganin ang buhay ni Liam dahil harap-harapan siyang babarilin ni Emil para makamit na nito ang matagal na niyang inaasam na paghihiganti laban sa pamilya Roja.
Ibubuwis din nina Liam at Olsen ang kanilang buhay sa huling pagkakataon upang subukang iligtas ang mga natitirang hostage na nakakulong sa isang tunnel sa ospital na kargado ng mga bomba.
Para mapanood ang huling tatlong linggo ng Roja sa Kapamilya Channel sa ALLTV2, buksan ang inyong digital black box, pindutin ang scan button sa remote control, at hanapin ang ALLTV2.
Tutukan ang maaksyong pagtatapos ng Roja, gabi-gabi tuwing Lunes hanggang Biyernes, 8:45 p.m., sa Kapamilya Channel sa ALLTV2, A2Z, at Kapamilya Online Live sa YouTube at Facebook.
