Poe: Build Back Better para sa matatag na Bicol vs kalamidad

BINANGGIT ni Senador Grace Poe ang kahalagahan ng prinsipyong “Build Back Better” upang gawing mas matatag ang rehiyon ng Bicol sa mga kalamidad habang binubuo din mula sa pag-urong na dulot ng CoVid-19 pandemic.

Ang rehiyon ng Bicol ay mahina laban sa mga sakuna. Nang wasakin ng Bagyong Rolly ang rehiyon, nagdulot ito ng P12.26 bilyong pinsala sa mga impraestruktura at P3.58 bilyong pinsala sa agrikultura.

Tumugon ang Panday Baya­nihan ni Senador Poe sa pamamagitan ng pagsasagawa ng relief operations sa Cama­rines Sur, Camarines Norte, Sorsogon at Catanduanes.

“Habang ang pagbibigay ng agarang tulong sa mga biktima ng kalamidad ay tamang gawin, ang paggawa ng mga komuni­dad na matatag sa mga kalamidad ay mas lohikal at mas mahusay na paraan ng pagprotekta sa buhay at kabuhayan,” sabi ni Poe.

Ang hinahangad ng alituntunin na “build back better” ay nangangahulugang ang proseso ng muling pagtatayo ng mga pamayanan na apektado ng mga sakuna ay dapat palakasin kaysa dati.

Ito ang isa sa mga pangunahing konsepto na nakalagay sa Senate Bill 124, akda ni Senador Poe, na kung ito ay magiging batas, lilikha ng Department of Disaster Resilience and Emergency Management.

Sinabi ni Poe, ang mga lalawigan na mahina laban sa mga kalamidad ay dapat mamuhunan nang higit sa katatagan – mga impraestruk­tura, pangka­buhayan at agrikultura.

Ang mga kalsada, tulay, paaralan, ospital, sentro ng kalusugan, proyekto sa pabahay ng gobyerno at mga impraestruk­turang nauugnay sa turismo ay dapat itayo o muling i-retrofit upang  madaig ang pinaka­malakas na posibleng bagyo.

Sinusuportahan din ng Senador ang pamamahagi ng mga climate-resilient na bigas, saklaw ng “Insurance” para sa mga pananim at palaisdaan, at pagtatayo ng maliliit na antas ng sistemang patubig sa Bicol.

Ipinaliwanag ni Poe, kahit ang mga interben­siyong ito ay nakatuon sa pangmatagalang plano, agad naman itong lilikha ng mga trabaho, magbibigay ng pagkain, at pasisiglahin ang pang-ekonomiyang aktibidad sa rehiyon na pinabagal ng CoVid-19 pandemic.

Ang matatag na pananim at produksiyon ng pangisdaan ng Bicol ay titiyakin din ang tuluy-tuloy na supply ng pagkain sa Luzon. Ang rehiyon ng Bicol ay umabot na sa 10 porsiyento ng produksiyon ng bigas at 14 porsiyento ng produksiyon ng isda sa Luzon.

Ang pagbabago ng Bicol sa isang matatag na rehiyon ay mag­bibigay ng isang malinaw na landas sa pag-unlad at matugu­nan ang labis na sentrali­sasyon ng pag­lago sa Metro Manila at mga karatig lalawigan na Bulacan, Cavi­te, Laguna, at Rizal.