Lola binaril ni lolo dahil sa P22K water bill

CEBU CITY – Nilalapatan ng lunas sa pagamutan ang isang 66-anyos misis makaraang barilin ng mister niyang 73-anyos kawani ng munisipyo dahil sa malaking bayarin sa tubig kamakalawa.

Nangyari ang insidente sa loob mismo ng kanilang bahay sa Sitio Luknay, Brgy. South Poblacion, bayan ng San Fernando, probinsiya ng Cebu.

Ayon kay SPO1 Francisco Salubre, nangyari ang pag-aaway ng dalawa nang malaman ng suspek na umabot sa P22,000 ang bayarin nila sa tubig.

Dagdag ng pulis, mayroong pinauupahang kuwarto ang mag-asawa at ang biktima ang tumatanggap ng bayad ng mga nangungupahan.

Sinasabing nagalit ang suspek dahil hindi nabayaran ng biktima ang kanilang bayarin at halos maputulan na sila ng suplay ng tubig.

Samantala, itinanggi ng suspek na binaril niya ang kanyang asawa.

Aksidente aniya ang nangyari dahil nahulog ang bag na pinaglalagyan ng kanyang armas.

Nakakulong na ang suspek sa San Fernando Police Station dahil sa ipinatutupad na gun ban ng Commission on Elections habang hinihintay pa ng pulisya kung magsasampa ng kaso ang misis laban sa kanyang mister.