Barker utas sa sekyu

PATAY ang isang barker makaraang saksakin ng guwardiya nang mapikon ang suspek dahil ibang pasahero ang pinasakay ng biktima sa ipinatawag niyang taxi sa Pasay City kahapon ng madaling-araw.

Nalagutan ng hininga bago idating sa Pasay City General Hospital ang biktimang si Severo Abulencia Jr., 58, ng Block 2, Lot 30, Sta. Rita Street, Brgy. 178, Zone 19, Maricaban ng nasabing lungsod.

Kasong homicide ang isinampa ng pulisya sa Pasay Prosecutor’s Office laban sa suspek na si Jeffrey Estrada, 30, security guard, ng 80-M Cornejo St., Malibay, Pasay City.

Sa pagsisiyasat nina SPO1 Giovanni Arcinue at PO3 Albert Barangas Jr., dakong 4 a.m. nang maganap ang insidente sa Aurora Boulevard at Red Cross Building, Brgy. 178, Zone 9, Maricaban.

Nauna rito, kinausap ng suspek ang biktima na itawag siya ng taxi ngunit nang makakuha ay ibang pasahero ang ipinasakay ni Abulencia.

Bunsod nito, bumunot ng patalim ang suspek at inundayan ng saksak ang biktima.