Outlook sa buhay ni Boyet, maganda pa rin

SA kabila ng lahat ng pinagdaanan niyang problema, mukhang maganda pa rin ang outlook sa buhay ni Christopher de Leon. Masayahin pa rin siya. Masaya pa siya kung magkuwento ng lahat ng kanyang ginagawa. Nakita namin siya sa launching ng bago niyang seryeng Beautiful Strangers.

Siguro nga, sabi nila, dahil din iyon sa kanyang pananampalataya. Alam naman natin na si Boyet ay isa sa mga artistang masasabing matibay ang pananampalataya sa Diyos. Kabilang kasi siya sa isang Catholic Christian community. In fact noong magkita kami, ang una niyang binati sa amin ay ang suot naming krus na sabi niya ”ganoon ka pa rin ha.”

Kung minsan, napakalaki talaga ng nagagawa ng pananampalataya ng isang tao. Kahit na anong hirap ng buhay ang dinaraanan, gumagaan pa rin ang kanyang pakiramdam at nakagagawa ng mga tamang desisyon.

Isipin ninyo si Boyet, magkasabay na nagkasakit ng malubha ang kanyang asawa at anak, pero nakayanan niya ang problemang iyon.

HATAWAN – Ed de Leon