Lady Stags, Chiefs sumalo sa tuktok

MINADALI ng San Sebastian College Lady Stags at Arellano University Lady Chiefs ang pagkaldag sa kanilang nakatunggali upang manatiling malinis sa team standings ng 90th NCAA womens’ volleyball tournament sa The Arena sa San Juan City Martes ng hapon.

Hinampas ng Lady Stags ang San Beda College, 25-22, 25-20, 25-9 habang pinayuko ng Lady Chiefs ang Lyceum of the Philippines University Lady Pirates, 25-14, 25-17, 25-16 upang saluhan ang College of Saint Benilde Lady Blazers at Perpetual Help Lady Altas sa tuktok kapit ang tig 2-0 win-loss records.

Kumana ng tig walong puntos sina CJ Rosario, Elaine Sagun, Menchie Tubiera at Danna Henson upang ilampaso sa tatlong sets ang Lady Pirates.

Ganado naman si Shakey’s V-League standout Gretchel Soltones kaya kumamada ito ng 19 points kasama ang 15 kills at apat na service aces upang tulungan ang Lady Stags na tapusin rin sa tatlong sets ang San Beda.

Sa men’s division, pinagpag din ng Stags at Chiefs ang Red Lions at Pirates upang makisalo rin sa unahan kasama ang Altas at Emilio Aguinaldo College Generals na may tig 2-0 win-loss slate.

(ARABELA PRINCESS DAWA)