20-anyos bebot 8 buwan sex slave sa lodging inn (Nag-check-in dahil nalasing)

CAGAYAN DE ORO CITY – Nailigtas ng mga tauhan ng Agora Police ang 20-anyos babae na sinasabing walong buwan naging sex slave ng isang lalaki sa loob ng lodging house sa siyudad na ito.

Ayon sa reklamo ni Gina, walong buwan siyang ginawang sex slave sa basement ng lodging house na pagmamay-ari ng pamilya ng suspek na kinilalang si Rito Estrella Jr.

Idineklarang nawawala ang biktima noong Marso at naka-blotter sa pulisya noon pang Hulyo.

Sa imbestigasyon ng pulisya, nag-check-in sa lodging house ang biktima dahil nalasing siya sa pakikipag-inoman sa mga kaibigan.

Ngunit biglang pumasok ang suspek sa kanyang kwarto at mula noon ay hindi na siya pinakawalan.

Kwento ng biktima, itinatali ng suspek ang kanyang mga kamay ng alambre upang hindi siya makatakas.

May panahon din na pwersahan siyang pinagagamit ng droga ng suspek at pinahuhubad sa harap ng mga kasosyo sa negosyo ng salarin. Sinasaktan aniya siya ng suspek kapag pumapalag siya.

Itinanggi ng suspek ang alegasyon at sinabing may sampung buwan na silang nagsasama.

Duda ng biktima, dalawang buwan na siyang buntis dahil hindi na siya dinadatnan ng buwanang dalaw.

Nailigtas ang biktima makaraan ma-contact ang kanyang kapatid at nakahingi ng tulong.

Nahaharap sa kasong serious illegal detention at rape ang suspek.